Foshnja 16 vjeçare

Është 16 vjeç, por duket si një 2 vjeçare. Për amerikanen Brooke Greenberg koha kalon në mënyrë krejt të veçantë. Trupi nuk i zhvillohet në mënyrë të njëtrajtshme, por çdo pjesë e trupit të vajzës-fëmijë duket se i zhvillohet në mënyrë të pavarur nga të tjerat.

Brooke ka mbushur 16 vjeç në janar të vitit 2009, peshon 7 kilogramë dhe është vetëm 75 centimetra e gjatë.

Sipas mjekëve shkencëtarë që ndjekin zhvillimin e saj çdo ditë, struktura skeletore e saj është tipike për një fëmijë 10 vjeçar. Kur është e lumtur nuk flet, por buzëqesh dhe është në gjendje të njohë personat që i rrinë pranë gjatë ditës.

Në shtatë vitet e para të jetës së saj i është dashur të përballet me shumë sëmundje, duke dalë gjithmonë fitimtare, shtatë raste me ulcerë në stomak dhe 14 ditë në koma si pasojë e një tumori në tru. Që në vitet e para të jetës i është nënshtruar një terapie intensive me hormone të rritjes, terapi e cila nuk pati efekt as në peshë dhe as në strukturën trupore. Asnjë doktor nuk guxon të japë një mendim se sa mund të jetojë Brooke.

Për të kuptuar bllokimin e rritjes dhe të plakjes së saj, shkencëtarët kanë marrë kampione të ADN-së dhe qelizave të saj dhe po i studiojnë me imtësi ato.

Doktor Richard Walker, profesor në Fakultetin e Mjekësisë në Universitetin e Floridës se Jugut, është i bindur që vajza është një çelës për shkencën. Rasti i saj mund të çojë në zbulimin e natyrës së vdekshmërisë njerëzore dhe në izolimin e gjeneve përgjegjëse për plakjen, për të siguruar një rini të përjetshme.