Shkyçe me Serbin, lidhe me Shqipërinë

Aksioni +355, Shkyçe me Serbin, lidhe me Shqipërinë
E hëne 14 Qershor 2010 18:59

Sot para ndërtesës së Qeverisë së Kosovës, Lëvizja për Bashkim zhvilloi aksionin e quajtur “+355”. Organizata e të rinjve, Lëvizja Rinore për Bashkim, në kuadër të këtij aksioni vendosi pllakatin me kërkesën që Qeveria e Kosovës pa asnjë vonesë t’i fillojë bisedimet me organet përkatëse të Republikës së Shqipërisë për shfrytëzimin e përbashkët të kodit telefonik shqiptar.

“Kështu do të shkëpusnim edhe një lidhje me shtetin serb, përkatësisht në vend të prefiksit serb +381 ne do ta kishim prefiksin shqiptar +355”, thuhet në komunikatën e kësaj lëvizjeje.

Po ashtu, në kuadër të këtij aksioni, sot në mbarë qytetin e Prishtinës u shpërndanë fletëpalosje me sqarime lidhur me këtë çështje, ndërsa mbrëmë të rinjtë e organizatës në shumë qytete të Kosovës kanë vendosur pllakate me po këtë përmbajtje.